मुंबई: महाराष्ट्रात मागील काही दिवसांपासून हवामानात पुन्हा एकदा वेगाने बदल होत असून विदर्भातील नागपूर, भंडारा आणि गोंदिया जिल्ह्यांमध्ये रविवारी मध्यरात्रीपासून विजांच्या कडकडाटासह अवकाळी पाऊस कोसळला.
हवामान विभागाने आज आणि उद्या राज्यातील काही जिल्ह्यांमध्ये पावसाचा अंदाज वर्तवला असून, मराठवाडा आणि विदर्भातील काही जिल्ह्यांमध्ये ‘येलो अलर्ट’ जारी करण्यात आलेला आहे.
हवामाना विभागाकडून मिळालेल्या माहितीनुसार, मराठवाड्यातील हिंगोली, नांदेड, लातूर, धाराशिव यांसह विदर्भातील गडचिरोली आणि चंद्रपूर या जिल्ह्यांमध्ये विजांच्या कडकडाटासह पाऊस पडण्याची शक्यता असून ‘येलो अलर्ट’ जारी करण्यात आला आहे. मध्य महाराष्ट्रातील सोलापूर व निफाड परिसरातही ढगाळ वातावरण असून हलक्या पावसाची शक्यता वर्तवण्यात आली आहे.
विदर्भाला पावसाने झोडपले
रविवारी मध्यरात्रीनंतर नागपुरात वादळी पावसाने अचानक हजेरी लावली. दिवसभर उकाड्याने हैराण झालेल्या नागरिकांना या पावसामुळे काहीसा दिलासा मिळाला; मात्र सोबतच वाऱ्याच्या जोरदार झोतांमुळे शहरातील काही भागांत वीजपुरवठा खंडित झाला. हवामान विभागाने सुरुवातीला पावसाचा अंदाज केवळ गडचिरोली व चंद्रपूर जिल्ह्यांपुरता वर्तवला होता. रविवारी संध्याकाळपर्यंत या अंदाजाची व्याप्ती वाढवत यवतमाळपर्यंत वादळी पावसाची शक्यता दर्शविण्यात आली. नागपुरात मात्र केवळ ढगाळ वातावरण राहण्याचा अंदाज होता.
तथापि, मध्यरात्रीनंतर अचानक ढगांचा गडगडाट सुरू झाला आणि जोरदार वाऱ्यासह पावसाची सर कोसळली. काही ठिकाणी झाडांच्या फांद्या तुटल्याच्या किरकोळ घटना घडल्या. विजेच्या तारा व उपकरणांवर परिणाम झाल्याने शहरातील काही भागांत तात्पुरता वीजपुरवठा खंडित झाला.
या अनपेक्षित पावसामुळे वातावरणात गारवा निर्माण झाला असून पुढील काही तास ढगाळ वातावरण कायम राहण्याची शक्यता व्यक्त केली जात आहे.