सिंधुदुर्ग जिल्हा परिषदेत महायुतीची सरशी; भाजप मोठा पक्ष, ठाकरे सेना चौथ्या स्थानी तर अपक्षांची बाजी!

सिंधुदुर्ग जिल्हा परिषद निवडणुकीत तीनही राणेंचा करिष्मा पहायला मिळाला. एकूण ५० जागांपैकी महायुतीने ४० जागा काबीज केल्या आहेत. २७ जागा जिंकून भाजपा हा सर्वात मोठा पक्ष ठरला आहे. शिवसेना शिंदे गटाला १३ जागांवर तर शिवसेना उद्धव ठाकरे गटाला केवळ ३ जागा मिळाल्या आहेत. एकूण ७ अपक्ष उमेदवार निवडून आले आहेत, त्यापैकी एक शिवसेना शिंदे गट पुरस्कृत आहे.

५० सदस्यांच्या या जिल्हा परिषदेत एकूण ८ उमेदवार बिनविरोध निवडून आले आहेत. यात भाजपचे ७ तर शिवसेना (शिंदे गट) यांचा १ उमेदवार आहे. भाजपा खासदार नारायण राणे, महाराष्ट्र राज्याचे मंत्री नितेश राणे, शिवसेना आमदार निलेश राणे यांनी विजयी उमेदवारांचे अभिनंदन केले आहे.