कणकवली नगरपंचायतीमध्ये विषय समित्यांचे सभापती आणि समित्यांच्या निवडीसाठी आयोजित करण्यात आलेल्या विशेष सभेत सत्ताधारी आणि विरोधी गटात प्रचंड वादंग पाहायला मिळाला. समित्या स्थापन करण्याच्या मुद्द्यावरून दोन्ही बाजूंनी आक्रमक पवित्रा घेतल्याने सभागृहातील वातावरण चांगलेच तापले होते. सभेच्या सुरुवातीला सत्ताधारी गटनेते रुपेश नार्वेकर यांनी ‘सध्या समित्या नेमण्यात येऊ नयेत’ असे लेखी निवेदन सादर केले, ज्यावर भाजपच्या गटनेत्या सुप्रिया नलावडे आणि त्यांच्या सहकाऱ्यांनी जोरदार आक्षेप घेतला. लोकशाही प्रक्रियेनुसार या निवडी तातडीने होणे गरजेचे असल्याचे विरोधकांनी ठासून सांगितले.
दोन्ही बाजू आपल्या भूमिकेवर ठाम राहिल्याने पीठासीन अधिकारी गौरी पाटील यांनी अखेर मतदानाचा मार्ग निवडला. मात्र, या मतदानात सत्ताधारी आणि विरोधी अशा दोन्ही बाजूंकडे समान मते पडल्याने मोठा पेच निर्माण झाला. या पेचप्रसंगातून मार्ग काढण्यासाठी अखेर चिठ्ठी टाकून निर्णय घेण्याचे ठरले. नशिबाने यावेळी सत्ताधारी गटाला साथ दिली आणि ‘समित्या न नेमण्याचा’ निर्णय चिठ्ठीद्वारे जाहीर झाला. या अनपेक्षित निर्णयामुळे सत्ताधारी गटाला तात्पुरता दिलासा मिळाला असला तरी पुढचा संघर्ष स्थायी समितीच्या स्थापनेवरून सुरू झाला.
स्थायी समिती गठीत करण्याची प्रक्रिया सुरू होताच भाजपचे स्वीकृत नगरसेवक बंडू हर्णे यांनी एक तांत्रिक मुद्दा उपस्थित केला. जोपर्यंत इतर विशेष समित्यांची कायदेशीर स्थापना होत नाही, तोपर्यंत स्थायी समिती स्थापन करता येत नाही, असा दावा त्यांनी केल्याने सभागृहात पुन्हा एकदा शाब्दिक चकमक उडाली. हा तांत्रिक पेच आणि वाढता वाद लक्षात घेता, पीठासीन अधिकारी गौरी पाटील यांनी या विषयावरील अंतिम निर्णय राखून ठेवला आहे. वरिष्ठ अधिकाऱ्यांशी चर्चा करून आणि कायदेशीर मार्गदर्शन घेऊनच यावर तोडगा काढला जाईल, असे त्यांनी स्पष्ट केल्याने कणकवली नगरपंचायतीच्या सत्तेचे गणित सध्या तरी अधांतरी राहिले आहे.