रत्नागिरी – जिल्ह्यातील विविध मतदान केंद्रांवर ईव्हीएम मशीन बंद पडण्याच्या प्रकारांमुळे लोकशाहीच्या उत्सवाला गालबोट लागले असून, या गंभीर बाबीवर शिवसेना नेते व माजी मंत्री रामदास कदम यांनी अत्यंत आक्रमक पवित्रा घेतला आहे. खेड तालुक्यातील जामगे येथे आपला मतदानाचा हक्क बजावल्यानंतर माध्यमांशी बोलताना कदम यांनी निवडणूक आयोगाच्या नियोजनावर प्रश्नांची सरबत्ती केली. मतदानाच्या दिवशीच एकामागून एक यंत्रे बंद पडणे हा निवडणूक यंत्रणेचा मोठा नाकर्तेपणा असल्याचे सांगत, त्यांनी आयोगाच्या कार्यक्षमतेवरच ताशेरे ओढले आहेत. “लोकशाहीची चेष्टा सुरू आहे का?” असा संतप्त सवाल करत त्यांनी या संपूर्ण गोंधळाबद्दल तीव्र नाराजी व्यक्त केली.
ईव्हीएम मशीनच्या विश्वासार्हतेवर सध्या जनतेमध्ये मोठे संभ्रमाचे वातावरण असल्याचे नमूद करत रामदास कदम यांनी निवडणूक आयोगाला थेट आव्हान दिले आहे. जर आयोग अत्याधुनिक यंत्रणा सुरळीतपणे राबवू शकत नसेल, तर पूर्वीप्रमाणे बॅलेट पेपरवरच निवडणुका घेण्यात याव्यात, अशी ठाम मागणी त्यांनी यावेळी केली. बॅलेट पेपरमुळे मतदारांच्या मनात कोणतीही शंका उरणार नाही आणि लोकशाहीवरील त्यांचा विश्वास अधिक दृढ होईल, असेही त्यांनी स्पष्ट केले. ईव्हीएममधील तांत्रिक बिघाडामुळे मतदारांचा वेळ वाया जात असून अनेकजण मतदान न करताच घरी परतत आहेत, ही बाब अत्यंत चिंताजनक असल्याचे त्यांनी अधोरेखित केले.
निवडणूक आयोगाने एकतर यंत्रणांमधील तांत्रिक त्रुटी कायमच्या दूर कराव्यात अन्यथा बॅलेट पेपरचा पर्याय स्वीकारावा, असे स्पष्ट बजावतानाच या संदर्भात आपण आयोगाकडे अधिकृत तक्रार आणि मागणी करणार असल्याचेही त्यांनी जाहीर केले. रामदास कदम यांच्या या आक्रमक भूमिकेमुळे आणि जिल्ह्यातील ईव्हीएम बिघाडामुळे निवडणूक प्रशासनाच्या नियोजनावर आता सर्वच स्तरातून टीका होत असून, या प्रकरणावरून राजकीय वातावरण चांगलेच तापण्याची चिन्हे आहेत.